بآعؤ ابٌوهُم =(

الأربعاء مارس 21, 2012 12:04 am

يمر بين الناس يسألهم ريال

شايب وحافي والرقع في ثيابه

صوت العصي لا دقت الأرض موّال

موّال حزنٍ رددوه الغلابه

الوجه شاحب والتجاعيد تختال

والوقت والأيام صاروا ذيابه

بنك الزمن أهداه مليون غربال

وأصبح رصيده ممتلي بالكآبه

ماتت طموحاته ولا عنده امال

يبكي على وقتٍ مضى في شبابه

صبّت له الدنيا ثمانين فنجال

تجرّع الأحزان علقم شرابه

قربت منه وقلت له كيف الأحوال؟

ونظر بعينٍ كلبوها غرابه

عمّي علامك ضايق الصدر والبال؟

أكيد بك سر ولا أحد درابه

بدى يفضفض قال لي خمسة عيال

سطوا على مالي وصاروا عصابه

قالوا سفيهٍ صابه جنون وهبال

وصك المحاكم زوّروا في كتابه

نسوا كفاحي لأجلهم شلتا لأحمال

واليوم كل للوفى صك بابه

باعوا أبوهم للأسف لاجل الأموال

باكر في يوم الحشر ويش الإجابه

والله حسافه صرتوا عيالي أنذال

يا كيف أبوكم ما حسبتوا حسابه؟

طال الحكي وياه يا ليت ما طال

يبكي قهر مسكين من حر مابه

حبيت راسه تمتم بصوته وقال

الموت ابطى وين حضرة جنابه!

الشاعر // عبدالحكيم اليوسف

مرهّ آعشق آلشعرَ
قديم لكن له تأثيربالقلبَ